30. maí – 2. júní 2024
Þann 30. maí 2024 fóru nokkrir félagsmenn Fókus í vorferð vestur í Dalasýslu. Markmið ferðarinnar var að skoða þetta fallega svæði og njóta þess að vera þar saman með myndavél í hönd.
Hér má sjá kort af svæðinu og þá staði sem við heimsóttum í ferðinni:
Dagur 1 (31. maí)
Gullfoss (í Gilsfirði)
Ferðin hófst (hjá höfundi) með tilkomumikilli heimsókn að Gullfossi í Gilsfirði. Gullfoss rennur í botni Gilsfjarðar, rétt fyrir ofan nyrsta bæ Dalasýslu, sem er nú kominn í hálfgerða eyði en landeigendur nýta hann sem sumarhús í dag.
Fossinn er töluvert hár og kraftmikill og bauð upp á fjölda myndatækifæra úr allskyns sjónarhornum. Þó svo að það vanti jarðhita á svæðinu og hvergi sé að finna Strokk á nærliggjandi svæði, þá gefur Gullfoss í Gilsfirði frænda sínum fyrir sunnan ekkert eftir hvað varðar glæsileika.
Hér var líka notað tækifærið til að leggja sig niður með útsýni yfir fossinn og njóta kyrrðarinnar í náttúrunni.
Ólafsdalur
Eftir að hafa skoðað Gullfoss fórum við inn í Ólafsdal, stað þar sem fyrsti bændaskóli landsins var stofnaður. Þar eru endurbyggð gömul hús með mikla sögu, þar á meðal minnisvarði um Torfa og Guðrúnu, stofnendur skólans.
Styttan af hjónunum sýnir þau horfa út á haf til vesturs, enda er útsýnið undurfagurt þegar skyggnið er gott seinnipart dags.
Þurranes
Gististaðurinn okkar í Þurranesi var alveg frábær fyrir hópinn, þar er stór borðsalur, rúm fyrir 20 manns og virkilega snyrtileg og fullbúin aðstaða.
Á kvöldin nýttum við fallegu birtuna og fórum út að mynda, meðal annars kindurnar á bænum og fjallstoppana allstaðar í kring. Við fengum einnig nýju árbókina afhenta og áttum góðar stundir við að fletta henni saman og skoða afrakstur síðasta árs.
Ef þú hefur áhuga á að koma með í ferðir eins og þessa, þá hvetjum við þig til að skrá þig í félagið.
Í félaginu er fólk á öllum aldri með mismunandi áherslur, stíl og smekk. Nú er rétti tíminn til þess að hitta annað áhugafólk og læra meira um ljósmyndun.
Dagur 2 (1. júní)
Sælingsdalur
Næsta dag lögðum við af stað einhverntímann eftir klukkan 10:00. Fyrst fórum við upp í Sælingsdal og tókum nokkrar myndir af nærliggjandi fjöllum, þar sem þríhyrningslaga klettar í ýmsum litum skreyttu landslagið.
Anna Soffía, einn af skipuleggjendum ferðarinnar, er þaulreynd í leiðsögn og veit meira en flestir um hvern krók og kima á svæðinu. Það var því virkilega gaman að fá að hlusta á hana segja frá og lýsa sögu svæðisins.
Krosshólaborg
Rétt hjá Sælingsdal er Krosshólaborg, stór klettur með steinkrossi á toppnum og minnisvarði um hina víðfrægu Auði djúpúðgu. Sagt er að hún hafi beðist fyrir á toppi borgarinnar en hún nam land við Hvammsfjörð og bjó í Hvammi, samkvæmt sögunni. Fyrir neðan klettinn er svo rétt sem nefnist Skerðingsstaðarétt.
Staðarfell
Í Staðarfelli er gömul kirkja ásamt nokkrum húsum sem áður hýstu meðferðarheimili á vegum SÁÁ og þar áður húsmæðraskóla um áratugaskeið. Við tókum myndir af kirkjunni í fallegri birtu með fjörðinn í bakgrunni og einhverjir klifruðu upp fyrir kirkjuna til að fá betra útsýni.
Dagverðarneskirkja
Eftir nokkra keyrslu á slæmum vegi komum við að Dagverðarneskirkju, sem er í hálfgerðri niðurnýslu. Kirkjan er friðuð síðan 2009 en hún var upprunalega sóknarkirkja nærliggjandi eyja og sveita í Breiðafirði, byggð 1848.
Þarna eru líka nokkrir kofar og eitt lítið hús sem virðist sæmilega viðhaldið. Við fengum okkur nesti í veðurblíðunni; örlítil gjóla, þurrt og bjart en þó skýjað.
Það var gaman að mynda fuglalífið á svæðinu.
Klofningur (skarð)
Næsta stopp á leið okkar fyrir Klofning var í samnefndu skarði sem liggur vestan megin við Klofningsnes. Þar á toppnum má finna útsýnisskífu og víðamikið útsýni yfir Breiðafjörð. Ef vel er að gáð má sjá glitta í Stykkishólm í fjarska.
Ballará (foss)
Næst stoppuðum við við Ballará um kl. 15:00, myndarlegan foss sem gengur hlykkjótt niður af fjallinu. Við tókum myndir af fossinum sjálfum og ótal litlum sprænum sem renna niður úr honum.
Skarðsströnd (Skarðsstöð)
Um kl. 16:10 héldum við að Skarðsstöð þar sem við tókum myndir af húsinu sem áður hýsti fyrstu verslun Dalasýslu frá 1890. Á svæðinu var einnig að finna mikið fuglalíf, fallegar strendur og sker en frá Skarðsstöð eru enn stundaðar veiðar, ekki síst grásleppuveiðar.
Tindar (surtarbrandsnáma)
Að lokum fórum við að Tindum, þar sem rekin var surtarbrandsnáma fram á 7. áratug síðustu aldar. Gamla innganginum að námunni hefur verið lokað með grind og ryðgaðir sporvagnar, notaðir til að ferja kolin upp úr námunni, liggja þar og veðrast upp. Við tókum nokkrar myndir af þessu merkilega mannvirki og skoðuðum svæðið umhverfis námuna.
Kvöldverður og kosningavaka
Ferðin endaði í Þurranesi á ljúfum nótum með kvöldverði og kosningavakt, þar sem við nutum samvista og ræddum ferðir okkar og myndir.
Þessi vorferð var frábær upplifun þar sem náttúran og menningin mættust á einstakan hátt. Hver staður hafði sína eigin sögu og fegurð, sem við fengum að njóta og fanga í myndum. Ferðafélagarnir og góða veðrið gerðu þessa ferð ógleymanlega.
Takk fyrir okkur og til hamingju með nýkjörinn forseta Íslands; Höllu Tómasdóttur.
Við hvetjum áhugasama um að skrá sig í félagið og njóta með okkur í komandi ferðum.
Kær kveðja,
Ferðanefnd Fókus
Fylgist með fleiri viðburðum og ljósmyndaferðum á www.fokusfelag.is.