 |
| Í nafni samstöðu vegna hertra smitvarnaaðgerða frestuðum við kvöldröltinu sem átti að vera síðasta þriðjudag. Vonandi kemst jafnvægi á faraldurinn bráðlega og þá getum við endurskoðað kvöldrölt fljótlega. Að því sögðu ætlum við að prófa svolítið nýtt. Okkur langar að efna til myndvinnsluæfinga á þann hátt að nokkur okkar leggja til ljósmyndir í púkk og þegar 10 ljósmyndir hafa borist munum við safna þeim saman og bjóða „bunkann“ fram sem heimavinnu til ykkar allra sem vilja. Allir fá tækifæri til að spreyta sig á myndvinnslu þessara 10 mynda og að nokkrum dögum liðnum munum við smala saman afrakstrinum og birta útkomuna fyrir alla að sjá og bera saman. Það eru tvær lexíur í þessu, annarsvegar að æfa okkur í myndvinnslu og hinsvegar að sjá hve ólíka túlkun er hægt að draga fram út frá handbragði hvers og eins einstaklings. Þetta er ekki keppni og ekki gagnrýni, þetta er eingöngu æfing til þess að læra, njóta og hafa gaman af. 1) Veldu mynd úr þínu safni til þess að deila með okkur hinum. Reyndu að vanda valið og velja mynd sem þú telur að hægt sé að vinna með í myndvinnslu, mynd af múrvegg væri til dæmis óhentugt innlegg. Skemmtilegast væri að fá vandaða landslagsmynd, kyrralífsmynd, abstract, arkitektúr eða portrait sem dæmi. Við viljum ekki fá hversdagsmynd eða „fjölskyldusnapp“, ekki senda okkur mynd sem þú myndir ekki nenna að vinna sjálf/ur. 2) Sendu aðeins eina mynd, RAW skrá helst, á myndir@fokusfelag.is fyrir kl. 18 föstudaginn 16. október. Best er að nota wetransfer.com til að koma viðhengjum stærri en 25MB til okkar. 3) Laugardaginn 17. október munum við senda ykkur hlekk þar sem hægt verður að sækja þessar 10 myndir í einum bunka. Þið hafið til kl 18.00 mánudaginn 19. október til þess að vinna og skila inn ykkar myndum. Skemmtilegast væri ef allir þátttakendur myndu vinna allar 10 myndirnar í bunkanum. Ljósmyndum skal skila sem JPG til baka. 4) Þriðjudagskvöld 20. október munum við birta afrakstur ykkar. Ef mjög margar myndir berast þá munum við líklega skipta þessu upp í nokkra pakka og endurtaka leikinn fljótlega eftir að fyrsta umferð klárast. kveðja, stjórnin |
Ljósmyndaraspjallið
Nú er farið af stað hlaðvarp um ljósmyndun. Þáttastjórnendur eru 2 meðlimir Fókus, þeir Gunnar Freyr og Óli Jóns. Þeir eiga óformlegt spjall við góða gesti og farið er um víðan völl. Þetta er frábær afþreying í umferðarteppunni.
Ljósmyndaraspjallið á Facebook
Þingvallaferð Fókus
Þann 4.okt var farin á vegum Fókus ferð á Þingvelli til að mynda haustlitina eða bara hvað sem er. Eitthvað af myndum eru farnar að tínast inn á spjallið, sjá nánar –> hér <–
World Press Photo sýningin
Nú fer hver að verða síðastur að kíkja á World Press Photo 2020 sýninguna sem haldin er í Kringlunni. Henni lýkur þann 2. október og það væri synd að láta hana framhjá sér fara.
Notkun ljósmyndafiltera
Fókusfélagarnir Guðjón Ottó og Kiddi tóku sig til sumarið 2020 og hentu í eitt stykki myndband um notkun ljósmyndafiltera og áhrif þeirra á ljósmyndir. Guðjón Ottó er filtermeistarinn fyrir framan myndavélina og Kiddi fyrir aftan myndavélina.
Haustið 2020
Nú er Fókus – félag áhugaljósmyndara að komast aftur í gírinn eftir gott sumarfrí. Fyrsti viðburður haustsins verður (upphitunar)streymi á Facebook síðunni okkar og hefst það kl 20.00, þriðjudaginn 8. september. Arngrímur formaður mun hefja fundinn með nokkrum orðum varðandi vetrardagskrána og í kjölfarið munu Kiddi, Guðjón Ottó og Ragnhildur rýna í og jafnvel vinna nokkrar innsendar ljósmyndir frá félögum.
Facebook-síðu Fókus finnur þú hér:
https://www.facebook.com/groups/fokusfelag/
Júníkeppni lokið
Innilega til hamingju með sigurinn Kolbrún Nadíra í júníkeppni Fókus 2020 sem hafði þemað „Rigning“. Keppendur voru 10 talsins og gáfu 17 aðilar atkvæði. Sjáumst í næstu keppni sem haldin verður í haust þegar starfsemi félagsins fer aftur í gang.
 | 1. sæti: Hoppípolla eftir Kolbrúnu Nadiru Árnadóttur |
 | 2. sæti: Blíðan í dag eftir Söru Elíasdóttur |
 | 3. sæti: Í blíðu og stríðu eftir Kristján U. Kristjánsson |
Vordagskrá 2020 lokið
Það hefur aldeilis hellingur gerst í félaginu frá síðustu færslu. Í kjölfar COVID þar sem flestum viðburðum þurfti að aflýsa var farið í aðalfund um leið og við máttum hittast og ný stjórn kosin eins og vaninn er. Félagið stóð fyrir þremur, tveggja klukkustunda löngum netstreymum með myndrýni frá góðum gestum á meðan samkomubannið stóð sem hæst. Haldin var ljósmyndasýningin „Fólk í Fólkus“ í Borgarbókasafni Reykjavíkur, Spönginni en sýningin stóð frá 4. júní til 3. júlí og tóku 29 félagsmenn þátt í sýningunni með 64 ljósmyndum. Ferðanefndin stóð ekki á sínu og hélt fjögur kvöldrölt með vikulegu millibili, fyrst á Hvaleyrina, svo Sólfarið í Reykjavík, fuglaljósmyndun við Vífilsstaðavatn og að lokum kvöldrölt með kaffihittingi í Grasagarðinum, en því kvöldrölti lauk með hraðkeppni þar sem 9 félagsmenn tóku þátt og vann Ólafur Magnús Håkansson fyrstu verðlaun með glæsilegri macro mynd sem sjá má við þessa fréttafærslu. 6 mánaðarkeppnir voru á önninni og hlaut Stefán Bjarnason 1. verðlaun fyrir maímánuð þar sem hann fékk prentara í verðlaun í boði Origo / Canon á Íslandi, og nú þegar þessi færsla er rituð er kosning í síðustu keppninni, júníkeppninni. Stjórn er þegar byrjuð að undirbúa haustönn fyrir árið 2020 og vonumst við til þess að sjá marga nýja meðlimi á næsta starfsári og hlökkum til að hitta þá gömlu líka.
Maíkeppni lokið
Til hamingju, AFTUR, Stefán Bjarnason með sigurmynd þína í maíkeppni Fókus sem bar þemað HREYFING. Canon á Íslandi bauð upp á þessa keppni og veitir sigurvegaranum Canon PIXMA TS-6350 fjölnotaprentara í verðlaun. Við þökkum öllum kærlega fyrir þátttökuna og vonumst til að sjá ykkur í næstu keppni.
 | 1. sæti: Daður á vorkvöldi eftir Stefán Bjarnason |
 | 2. sæti: Twirl eftir Ragnhildi Guðrúnu Finnbjörnsdóttur |
 | 3. sæti: Ninja eftir Þóri Þórisson |
Kosning hafin í maíkeppni
Kosning er hafin í maíkeppninni og að þessu sinni mun Canon á Íslandi / Origo gefa sigurvegaranum Canon PIXMA TS-6350 fjölnotaprentara. Athugið að til þess að geta kosið þarftu að vera meðlimur á spjallinu en allir geta skráð sig á spjallið án þess að skrá sig í sjálft Fókusfélagið. Við minnum á að öllum er velkomið að taka þátt í ljósmyndakeppnum Fókus.
En það er ekki allt og sumt, ljósmyndasýningin okkar Fólk í Fókus er enn opin og mun standa til 3. júlí. Opið alla virka daga milli 10-19 og 11-19 á föstudögum.
Sömuleiðis er aðalfundur Fókus nýafstaðinn en þar var meðal annars kosin ný stjórn fyrir næsta starfsár. Þeir Fókusfélagar sem hafa skráð sig á spjallið geta séð fundargerðina á læstu svæði Fókusfélaga. Til þess að sjá hverjir sitja nú í stjórn Fókus fyrir næsta starfsár geta smellt hér.
Starf Fókusfélagsins er nú alveg að detta í sumarfrí en kvöldrölt verða vikulega á dagskrá á þriðjudögum út júní. Næsta kvöldrölt verður á Hvaleyri í Hafnarfirði, eingöngu fyrir Fókusfélaga.