Ferðanefnd Fókus þótti ástæða til að brjóta upp ferðamátann hjá félaginu. Ákveðið var að gera tilraun með kvöldgöngur einu sinni í viku í júní þar sem myndatökur yrðu aðal viðfangsefnið. Þær hafa haldið áfram, nú hafa verið farnar tvær aukaferðir. Ekki er reiknað með framhaldi á þessu starfi, nema þá einhver detti niður á sérstaklega skemmtilega hugmynd en þá verður gerð atlaga að því og undirtektir kannaðar.

Myndina tók Helga Jörgensen, formaður ferðanefndarinnar, í ferð á Selatanga. 

Ferðirnar eru orðnar fimm og þátttakendur komnir upp í 40, svo þetta hefur lukkast vel. Farið hefur verið í Grasagarðinn í Laugardal, tvisvar í Elliðaárdalinn, í Búrfellsgjá í Heiðmörk og nú síðast á Selatanga og Seltún í Krýsuvík. Eftir þessar ferðir hafa félagar sett margar frábærar myndir inn á vefinn og fengið dóm á þær.

Á Selatöngum var gömul verstöð, þar var bæði reimt og margar drauga- og kynjasögur eru til frá þessum stað. Skálholtsstaður átti ítök þar. Núverandi minjar á Selatöngum eru frá 19. öld en saga er um að róið hafi verið frá 12. öld. Vísa er til um menn sem réru þar eitt sinn:

Tuttugu og þrjá Jóna telja má,

tvo Árna, Þorkel, Svein,

fimm Guðmunda og Þorstein þá.

Þar með Guðlaug, Freystein.

Einara tvo, Ingimund, Rafn,

Vilhjálmur Gesti verður jafn,

Selatanga sjóróðramenn:

sjálfur guð annist þá.

Við Festarfjall var stansað og þar heillar sjórinn mig algjörlega en við vorum þarna rétt um það leyti er sól var að hverfa. Síðan haldið niður á Selatanga, þeir sem voru með höfðu ekki komið þar og var skemmtilegt að leiða þá í allan sannleika um staðinn. Rekaviður og fiskbyrgi eru víða og ryð en sumir í hópnum eru sérstklega áhugasamir um slíka hluti. Síðan var haldið í Seltún en þar náði ég ekki myndum vegna þess hversu skuggsýnt var orðið. Þegar við komum upp á Vatnskarðið blasti við sólarlagið. Heim var ég komin rétt eftir miðnættið svo þetta var gott úthald og menn töluðu um að fara síðan á þessar slóðir á eigin vegum og þá að degi til. Þyrstir í meira myndaefni sem er óþrjótandi.

Helga Jörgensen